A RADIO ESCOLAR CAMIÑA CARA O 8M

 
Quince nenas e nenos de 4º, 5º e 6º participaron nun obradoiro de edición de radio fóra do horario lectivo.
Coa dirección de Verónica, de AGARESO, crearon os guións para editar e gravar as súas cuñas publicitarias dun xeito colaborativo.  As irmás Mirabal, Alexia Putellas, algunhas mulleres da nosa historia e as Tanxugueiras, foron as mulleres seleccionadas como referentes neste 8M para a nosa radio escolar.
Pouco a pouco, a rapazada destes grupos formará a outras nenas e a outros nenos do centro no manexo dos elementos para a realización dos podcasts.
Esta proposta enmárcase nas actividades da biblioteca Helena Villar, dentro do seu programa "Radio na biblio", así como nas da modalidade Iguala-T dos CPInclúe nos que participa o centro. Podedes escoitala en lulunasondasblogspot.com ou premendo na imaxe inferior.

ENCONTROS LECTORES: HOMENAXE A EL HEMATOCRÍTICO E RUTA DE VERSOS POR SANTIAGO

 

Magnífica acollida tivo a homenaxe a El Hematocrítico que se realizou nos Encontros Lectores da biblioteca Helena Villar.
Participaron un total de trinta e cinco nenas e nenos que, segundo o seu nivel lector,
comentaron Gaivota Gourmet e Dona Problemas. Tamén houbo tempo para falar sobre Alcaldesa Vermella ou Axente Riciños, títulos imprescindibles para facer lectoras e lectores críticos.

Neste mes de febreiro, o día 28, sairemos do recinto escolar para coñecer por Santiago de Compostela cales foron as primeiras manifestacións escritas da lírica en lingua galega: as Cantigas. Visitaremos lugares vencellados con Bernal de Bonaval, Airas Fernández Carpancho, Joan Vasquez de Talavera e Airas Nunez.
Remataremos o percorrido nunha biblioteca símbolo da emigración, a biblioteca América do Pazo de Fonseca. Alí, alumnado e familias poderán contemplar distintos facsímiles medievais, entre eles o do libro máis antiguo escrito en galego: O libro das horas.

23 de FEBREIRO DÍA DE ROSALÍA

 

No CEIP López Ferreiro celebramos o Día de Rosalía ilustrando poemas desta poetisa e escritora galega, e o resultado quedou plasmado en chapas que se repartiron ao persoal e alumnado do centro.

 

30 DE XANEIRO DÍA ESCOLAR DA NON VIOLENCIA E DA PAZ

Hoxe 30 de xaneiro, DÍA ESCOLAR DA NON VIOLENCIA E DA PAZ, no CEIP López Ferreiro tentaremos animarlle o día a alguén, con pingas e mensaxes de paz.

Participa e te sentirás moito mellor!

OS ENCONTROS LECTORES REGRESARÁN EN XANEIRO.

 Parece que as propostas dos nosos clubs de lectura están tendo moi boa acollida entre as lectoras e os lectores do CEIP López Ferreiro.

Polo momento, traballamos a narración e o libro divulgativo (en formato cómic para quen ten autonomía lectora). Pero a partir de xaneiro, haberá máis sorpresas: a mitoloxia,  a filosofía, o teatro, a poesía…, e algunha saída, van estar presentes.

Estade atentas e atentos ás notas informativas da biblioteca. Agardámosvos!!

 

RECOMENDACIÓNS LECTORAS

 

DÍA INTERNACIONAL DAS PERSOAS CON DISCAPACIDADE