ENCONTRO LECTOR.

Grandes momentos compartidos nun novo Encontro Lector 

O pasado xoves 26 de febreiro ás 17:00, celebramos unha magnífica xornada de lectura na biblioteca coa participación das familias, do alumnado e do profesorado responsable da actividade. O encontro constituíu un auténtico éxito grazas á participación e ao entusiasmo demostrado por todos e todas as asistentes.

Compartimos e analizamos “Grande e Pequena”, de Arianna Squilloni e Raquel Catalina, unha obra galardoada que nos achega á natureza e á reflexión sobre o paso do tempo. As nenas e os nenos amosáronse fascinados coa historia e participaron activamente na posta en común das súas impresións e interpretacións.

A continuación, o grupo de lectoras e lectores autónomos protagonizou unha enriquecedora tarde de análise e aprendizaxe arredor da novela “Trampa de Lume”, de Núria Martí Constans. Afondamos no incendio da fábrica Triangle en Nova York no ano 1911 e reflexionamos sobre a relevancia histórica dos movementos en defensa dos dereitos laborais das mulleres. Resultou especialmente satisfactorio comprobar o interese suscitado e a calidade das intervencións do alumnado.

Finalmente, as familias lectoras abordaron “A Praza do Diamante”, de Mercè Rodoreda, unha das obras máis salientables da literatura catalá e española. A historia de Natalia durante a guerra civil e a posguerra provocou fondas emocións e deu pé a unha reflexión compartida sobre a dureza daquela etapa histórica. O diálogo desenvolveuse nun clima de respecto e sensibilidade, favorecendo unha conversa profunda e enriquecedora.

En definitiva, tratouse dunha xornada altamente proveitosa, caracterizada pola implicación colectiva e polo excelente ambiente de convivencia. A experiencia resultou especialmente significativa por servir como punto de partida das conmemoracións do 8M. Sen dúbida, continuaremos promovendo iniciativas que fomenten o hábito lector e o intercambio cultural na nosa comunidade educativa.

Queremos expresar un agradecemento moi especial a Maricarmen Montero, antiga mestra e directora do noso centro, pola súa presenza, apoio e compromiso constante coa vida cultural e educativa da escola. A súa participación supuxo unha honra e un estímulo para toda a comunidade.

O noso máis sincero agradecemento ás familias, ao alumnado e ao profesorado pola súa colaboración e compromiso coa lectura compartida. Ata a próxima!

ENTRE FLORES E VERSOS FEBREIRO CON ROSALÍA.

Febreiro é o mes no que celebramos a Rosalía de Castro, a muller que lle deu voz e dignidade á nosa lingua, lembrando o aniversario do seu nacemento. Ela mesma cantaba: “Nasin cando as prantas nasen, no mes das flores nasin”, versos que latexan cada ano con máis forza cando chega este tempo.

Desde a Biblioteca Escolar quixemos renderlle a nosa particular homenaxe, arrodeándoa simbolicamente dunha chea de flores, como se cada unha delas fose unha palabra agradecida pola súa obra e polo seu legado. A súa poesía segue a emocionarnos e a ensinarnos a mirar o mundo con sensibilidade, compromiso e amor pola terra.

O día 23, en colaboración co Equipo de Dinamización da Lingua Galega e o servizo de comedor escolar, serviuse o emblemático “caldo de gloria”, ao que canta Rosalía nun dos seus poemas, convertendo a xornada nunha experiencia literaria e tamén gastronómica. Foi unha maneira fermosa de achegar a poesía á vida cotiá e de saborear, literalmente, a nosa tradición.

Ademais, o alumnado de sexto de Educación Primaria tivo a oportunidade de realizar un “Roteiro Rosaliano” polos lugares da cidade vencellados á autora, descubrindo espazos que gardan a súa memoria e afondando na súa figura. Visitamos o Hostal dos Reis Católicos, onde foi bautizada; a estatua de Rosalía na Parque da Alameda; algúns dos lugares onde viviu na cidade; o barrio de Santo Agostiño; e o Panteón de Galegos Ilustres, onde repousan os seus restos. Cada parada foi unha oportunidade para coñecer mellor á escritora e comprender a fonda pegada que deixou en Compostela e en Galicia enteira.

Nesta actividade contamos coa inestimable colaboración da nosa querida Maricarmen Montero, mestra e directora do noso centro durante anos, e que segue moi vencellada a el. A súa sabedoría e entusiasmo fixeron do roteiro unha experiencia inesquecible.

Cómpre lembrar que Rosalía foi chamada “a Musa dos pobos” por Manuel Curros Enríquez, un título que segue a definila á perfección: voz do pobo, conciencia crítica e símbolo da nosa identidade.

Moitas grazas, Maricarmen, por acompañarnos e por seguir sementando amor pola nosa cultura.

Porque en febreiro, máis ca nunca, celebramos que a nosa lingua teña voz de muller. E esa voz chámase Rosalía.

XA CHEGOU A MALETA VIAXEIRA!

Esta semana recibimos con moita ilusión na nosa biblioteca a Maleta Viaxeira do CEIDA (Centro de Extensión Universitaria e Divulgación Ambiental de Galicia), un recurso educativo cheo de sorpresas e aprendizaxes.

A maleta trae unha fantástica selección de libros sobre natureza, ecoloxía e medio ambiente, pensados para espertar a curiosidade e o amor polo noso planeta desde as primeiras idades.

O alumnado de educación infantil e do primeiro ciclo de primaria xa comezou a mergullarse nestas lecturas tan especiais. A través de contos, álbums ilustrados e libros informativos, están a descubrir a importancia de coidar a natureza, respectar os animais e protexer o medio ambiente.

Este tipo de iniciativas enriquecen a nosa biblioteca e axudan a fomentar valores fundamentais como a responsabilidade, o respecto e o compromiso coa contorna. Ademais, a lectura convértese nunha viaxe apaixonante que nos leva a coñecer mellor o mundo que nos rodea.

Seguiremos compartindo convosco as experiencias e aprendizaxes que vaian xurdindo arredor desta marabillosa maleta.

 Grazas ao CEIDA por achegarnos este recurso tan valioso!

O pasado 28 de xaneiro, algún membro do equipo de biblioteca do centro participaron nunha xornada formativa organizada pola asesoría de bibliotecas escolares.

A presentación correu a cargo de Manuel Rodríguez Calviño, quen nos achegou saberes moi interesantes acerca da tradición téxtil da nosa comunidade, axudándonos a comprender mellor o valor cultural, histórico e social destes oficios e o seu potencial como recurso educativo.

Esta formación resultou moi enriquecedora e práctica, xa que nos permitiu coñecer novas propostas para dinamizar a biblioteca e convertela nun espazo aínda máis vivo, creativo e participativo. Ao longo da sesión compartíronse experiencias doutros centros, ideas para fomentar o gusto pola lectura e estratexias para integrar a biblioteca no día a día das aulas.

Falouse tamén da importancia de crear comunidade lectora: alumnado, profesorado e familias formando parte dun mesmo proxecto. Levamos moitas ideas para aplicar no colexio: actividades de animación lectora, recomendacións entre iguais, propostas de escritura creativa e novas formas de organizar os espazos para facelos máis acolledores.

Nos vindeiros meses iremos poñendo en práctica todo o aprendido. A nosa biblioteca segue medrando e enchéndose de vida!

Seguide atentos… pronto haberá novidades...

FORMACIÓN DE VOLUNTARIADO

Conscientes da importancia e da inestimable axuda que supón a colaboración do alumnado voluntario, desde a Biblioteca Escolar Helena Villar levamos a cabo, coa colaboración da mestra Paz, unha nova xornada de formación destinada ao noso equipo de voluntariado.

Esta sesión formativa centrouse en afondar no coñecemento do Sistema de Clasificación Universal, fundamental para a correcta organización e localización dos fondos bibliográficos, así como no funcionamento xeral da biblioteca: procedementos de préstamo e devolución, colocación axeitada dos materiais, coidado dos espazos e apoio ás persoas usuarias.

A formación do alumnado voluntario constitúe unha peza clave para garantir un servizo bibliotecario eficiente, organizado e accesible para toda a comunidade educativa. A vosa implicación contribúe non só ao bo funcionamento da biblioteca, senón tamén á creación dun espazo máis dinámico, colaborativo e enriquecedor.

Queremos expresar o noso sincero agradecemento á mestra Paz pola súa disposición e acompañamento nesta iniciativa, así como a todos e todas as alumnas e alumnos que dedicades parte do voso tempo de lecer a facer que a nosa biblioteca funcione un chisquiño mellor cada día.

A biblioteca é un proxecto común: grazas por formar parte del.

E TI, POR QUE LES?

Despois dos preparativos do inicio de curso, a biblioteca está lista para abrir as súas portas, non só para o préstamo de libros, senón tamén para converterse, unha vez máis, no corazón do noso colexio. E que mellor maneira de comezar ca cunha actividade que nos inclúe a todos e todas?

O taboleiro da biblioteca transformouse desde hoxe nun mural colaborativo que amosa a razón de ser da nosa biblioteca: a lectura.

Un mural no que o alumnado é o verdadeiro protagonista. Quixemos que fosen eles e elas quen contasen a súa historia cos libros.

O mural céntrase nunha pregunta directa e persoal: “E ti, por que les?”

A cada participante entregóuselle a silueta dun libro en branco. Este pequeno “libro” foi un lenzo no que plasmar a súa razón única, persoal, enxeñosa e sincera.

O resultado foi un mosaico de razóns do máis orixinais.

As respostas son un testemuño marabilloso da diversidade dos nosos lectores e lectoras. As do mural son só unha pequena mostra; podemos atopar moitas máis por todo o colexio!

Xuntas, forman unha paisaxe literaria que nos representa a todos e todas.

Non hai respostas correctas nin incorrectas. O que para uns é evasión, para outros é coñecemento, consolo, risa ou desafío. Todas as razóns son válidas e enriquecen o noso mural común.

Este proxecto non é só unha decoración bonita: é un recordatorio visual de que a biblioteca é un espazo vivo, construído por e para o noso alumnado. Un lugar onde cada lector ou lectora, coa súa motivación persoal, é unha peza fundamental.

Agardámosvos entre libros e razóns.

O equipo da biblioteca

Animación a lectura

Actividade de animación a lectura con contacontos