RECOMENDACIÓNS LECTORAS VERÁN 2024

LETRAS GALEGAS NA BIBLIOTECA HELENA VILLAR

A biblioteca Helena Villar contribuiu a difundir a orixe da nosa lingua e o porqué da
celebración do Día das Letras Galegas cun podcast especial en Lulu nas Ondas,
elaborado polo alumnado de 4º, 5º e 6º.

Asemade, Marisa Irimia presentou ás nenas e aos nenos do López Ferreiro a biografía
de Luísa Villalta como unha narración en forma de conto da Luísa nena. O relato estivo salpicado de fragmentos da obra poética da homenaxeada.

O día 15 de maio, realizouse unha breve ruta xograresca desde Bonaval ata a biblioteca
América, no pazo de Fonseca.
As nenas e os nenos amosáronlles ás súas familias aspectos históricos da nosa cidade
vencellados cos trobadores que viviron en Compostela, e así percorremos tamén os
inicios da nosa literatura.
A actividade rematou na biblioteca América, onde a súa encargada, Mabela, nos
deixou tocar e apreciar un facsímile do Libro das horas de Pedro I, datado no ano 1055 e considerado o libro máis antiguo de Galicia. No mesmo lugar, tamén se nos amosou parte do legado que a emigración supuxo para Galicia.

E o 5 de xuño, remataremos as actividades do nosos Encontros lectores coa lectura de
dous títulos que nos falan sobre o paso do tempo: Cando chega o outono e
Sobremesas sobre versos, coa presenza de Raquel Castro, autora deste último libro.

En resumo, diferentes propostas para distintas maneiras de ler.

23 DE ABRIL- DÍA DO LIBRO

No CEIP López Ferreiro celebramos o Día do Libro coa colaboración das familias e, por suposto, coa implicación do alumnado elaborando portadas de libros, e participando toda a comunidade educativa na votación para a elección dos favoritos.

Nas aulas tamén se fixeron actividades para a celebración deste día. 

Queredes ver o resultado?

 

ABRIL, MES DOS LIBROS: DÍA INTERNACIONAL DO LIBRO INFANTIL E XUVENIL.

Para celebrar o Día do libro infantil e xuvenil, Marisa Irimia achegouse ao CEIP López Ferreiro, para amosar, ante unha biblioteca ateigada de ouvintes, que os contos serven para unir culturas, pois existen en todas elas.

E así, por medio do kamishibai, presentou “O gato sol”, conto tradicional vietnamita; logo, desde o Chad, tróuxonos a historia de “Por que hai tantas pedras no fondo dos ríos?”. Xa fóra de tempo amosounos “Hans e a princesa”, conto tradicional noruegués.

En definitiva, unha tarde na que grazas ao programa Lectura e familias, reflexionamos sobre a interculturalidade e na que se fortaleceron os vínculos entre o público adulto e o máis novo por medio da literatura tradicional; neste caso, representada.

22 DE MARZO DÍA MUNDIAL DA AUGA

O alumnado de 5º de educación primaria realizou varias actividades sobre a auga.

Queredes velas? 

 

PABLO OTERO AMOSOUNOS COMO CREAR EN FAMILIA

Dentro do programa Lectura e familias, o xoves 7 de marzo recibimos no CEIP López Ferreiro a visita de Pablo Otero, artista visual que ten ilustrado diferentes obras como Gramática da fantasía de Gianni Rodari, Cidades de Fran Alonso ou A cociña de Toto Morube de José A.Ramírez Lozano. 

Ademais, tamén probou sorte como autor, entre cuxas historias destaca Parece unha formiga, publicada por Kalandraka.

Nesta ocasión amosounos a creatividade que pode agocharse trala escritura das palabras. E así xurdiu todo un mundo de posibilidades coa composición de diferentes ideogramas por parte do alumnado e as súas familias.

E partindo dunha esponxa con mango, de anteolllos estendibles, de fotos antigas, de pelotas saltarinas…, abriuse a imaxinación de todas e de todos para compoñer adiviñas, poemas, pequenos contos, chistes…

En definitiva, diversas técnicas para traballar en familia e comprender que a lectura e a escritura abren novas visións pola súa creatividade.

E agora, xa esperamos por Marisa Irimia e o seu Kamishibai para o 3 de abril. Estades
convidadas e convidados!

A BIBLIOTECA DO CEIP LÓPEZ FERREIRO CELEBRA A SEMANA DA PRENSA NA ESCOLA

Durante esta semana o alumnado buscou na prensa noticias relacionadas co PDI deste curso "A auga" e fóronse colocando nun taboleiro para que todo o alumnado poida lelas, e traballar sobre as mesmas.

ABRACADABRA E AS SÍLABAS BAILAN!!

Dentro do programa Lectura e familias no que o noso centro participa, organizaremos un obradoiro de escritura creativa e poesía visual para alumnado e familias na biblioteca Helena Villar, o xoves 7 de marzo, ás 17:00 h., baixo o título “Abracadabra e as sílabas bailan”.

No obradoiro, dirixido por Pablo Otero, haberá divertimentos da lingua para explorar a ficción, o absurdo, o tachismo, os xogos de grallas tipográficas ou as posibilidades narrativas do teclado dos teléfonos. Ademais, remataremos elaborando ideogramas, xa que estamos no mes da poesía!
Premendo na imaxe do cartel anunciador, poden inscribirse ou formular calquera
consulta relacionada con este obradoiro.

A RADIO ESCOLAR CAMIÑA CARA O 8M

 
Quince nenas e nenos de 4º, 5º e 6º participaron nun obradoiro de edición de radio fóra do horario lectivo.
Coa dirección de Verónica, de AGARESO, crearon os guións para editar e gravar as súas cuñas publicitarias dun xeito colaborativo.  As irmás Mirabal, Alexia Putellas, algunhas mulleres da nosa historia e as Tanxugueiras, foron as mulleres seleccionadas como referentes neste 8M para a nosa radio escolar.
Pouco a pouco, a rapazada destes grupos formará a outras nenas e a outros nenos do centro no manexo dos elementos para a realización dos podcasts.
Esta proposta enmárcase nas actividades da biblioteca Helena Villar, dentro do seu programa "Radio na biblio", así como nas da modalidade Iguala-T dos CPInclúe nos que participa o centro. Podedes escoitala en lulunasondasblogspot.com ou premendo na imaxe inferior.

ENCONTROS LECTORES: HOMENAXE A EL HEMATOCRÍTICO E RUTA DE VERSOS POR SANTIAGO

 

Magnífica acollida tivo a homenaxe a El Hematocrítico que se realizou nos Encontros Lectores da biblioteca Helena Villar.
Participaron un total de trinta e cinco nenas e nenos que, segundo o seu nivel lector,
comentaron Gaivota Gourmet e Dona Problemas. Tamén houbo tempo para falar sobre Alcaldesa Vermella ou Axente Riciños, títulos imprescindibles para facer lectoras e lectores críticos.

Neste mes de febreiro, o día 28, sairemos do recinto escolar para coñecer por Santiago de Compostela cales foron as primeiras manifestacións escritas da lírica en lingua galega: as Cantigas. Visitaremos lugares vencellados con Bernal de Bonaval, Airas Fernández Carpancho, Joan Vasquez de Talavera e Airas Nunez.
Remataremos o percorrido nunha biblioteca símbolo da emigración, a biblioteca América do Pazo de Fonseca. Alí, alumnado e familias poderán contemplar distintos facsímiles medievais, entre eles o do libro máis antiguo escrito en galego: O libro das horas.

23 de FEBREIRO DÍA DE ROSALÍA

 

No CEIP López Ferreiro celebramos o Día de Rosalía ilustrando poemas desta poetisa e escritora galega, e o resultado quedou plasmado en chapas que se repartiron ao persoal e alumnado do centro.